N KUYI FAATUMA
Faatuma inke kuyi an ŋa wuro
Faatuma inke kuyi an ŋa kiye
Nke wa tu nan ti
Foofo feti , kuyi faranfare falle
Nke ga ma kori
Faatuma an na ňa in da soobe
Faatuma an na ňa in da taagumanse
Taagumanse be ga nta buruxene abada
N sondonmen noxon taagumanse
Faatuma an na ňa in da arjaxe
Faatuma an na ňa in da suuge
Nke na rege xo jinnanwuruŋuro
An na ňa in kinbakka
Faatuma an na ňa in tirindun jaabindu
Kutande do sooxiye ga nta do an ŋa
Sunpu kutiye do neqetuntaaxu ga nta do an ŋa
Misoye do munafaxaaxu ga nta do an ŋa

Faatuma an na ňa in da ngenbu
Nke na fanqe kiyen do wuro
Faatuma an na ňa in da waale , abadan waale
Fanqe nta ňaana waale ga nta ayi
Waale xa nta kiteene fanqe falle
Faatuma an xanuyen na ňa in da muso
N na wuyi an suugunu
N na kira an suugunu ma in xannen gan saale

Faatuma in na in xaliiben do in kayiti deren wutu
N na an ňa taaruxu
Faatuma in na joppa ti an toxo
Faatuma in na lagari ti an janmu
Ma in yaaxanjiinin ga sigi in yaaxo
Faatuma yugon do yaxaren su na sowo
Faatuma leminen do xirisen su ňaxali
Nke na an jakki , na an danbi duna yexi yaxaren su kanma
Faatuma ke su do an xanuyen batte
An dunadun xanuye , an laaharan xanuye
Faatuma an xanuye ke be xenpa ga nta ayi
Faatuma an xanuye ke be ga da in ňa meenin da missale
Yelli in ga nta wundi ke kuyi noxo