Le POEME en Soninke [ SOONINKEN NI ! ].

[miss ében]

JAMU ( la paix )

Jamu , jamu duuro
Jamu , jamu do xeeri
Nke ra nta bireene jamu falle
Jamu , suxuban do lelle
Jamu , kiyen do wuro
Nke na jamu ya ňaagana in salle su tebe
Jamu do xeeri, nke do in dunkoonu
Jamu duuro , nke do in taaxallenmon naxa
ALLA gan na jamu do xeeri fanken ritini
Jamu do xeeri saara do renme naxa
Jamu duuro , yugo do i yaqen naxa
Jamu , faaba renmun naxa

Nke na jamu ya muurunu yillekereye su
Nke ra nta yigeene jamu falle
Nke ra nta xenqene jamu do xeeri falle
Nke ra nta gollini jamu falle
Nke ra nta tuwiini jamu duuro falle
Jamu do xeeri , an na minna ?
Jamu duuro , an xa ?
Nke nta tanpini
Nke nta ňuxutene
N ga ma jamu ya wori falle
N ga ma jamu ya kita falle

Jamu , jamu do xeeri
Jamu , jamu duuro
Nke na jamu sirowun ya ňaana tuuma raxe
Nke ga na sanku
Nke na du wara do jamu fanke
Jamu , an na minna ?
Nke na jamu ya batta
Jamu , an yaani inke xana
Nke ga na wundi xenqo
N ga ma jamu do xeeri wori
Nke na lasame , lasamaye fataama

Jamu , jamu duuro
Jamu , jamu do xeeri
Nke ga na jamu kita in kitte ke
N na jamu tunci kaanin do konpon noxo
Nke ga na jamu raga in kitte ke
N jamu taaxundi debun do jamanun noxo
Jamu , soxaana do naaburu maraana naxa
Jamu , fankama do misikiina naxa

Jamu , jamu do xeeri
Jamu , jamu duuro
Nke na jamu ya ňaagana fatanbinne do fatanqulle naxa
Jamu , misilime do kaafiri naxa
Nke na jamu ya muurunu yugo do i yaqe naxa
Jamu , renme do saara naxa
Jamu , kinbakkan do kinqennan naxa
Jamu do xeeri , saahelin do banbuuxu
Jamu duuro , kanmun do ňiiňe
ALLA gan na jamu do xeeri ňa gunnen do kaanin noxo
ANMIINA YA RABBI

Amine, Amine
Marirenme tes poèmes sont magnifiques yeli Tounka Siré gana an digamou mougou.
JAMU dans ce monde ou ce mot n'a plus de sens....

[kabu tirera]

SOONINKEN NI:
sooninke sunpu kama
sooninke xati kama
sooninke deemanda
sooninke medeemanda
sooninke jikke tappa
sooninke lahidu kama
sooninke sironda
sooninke liginda
sooninke tettekuretenda
sooninke haaju tuwa
sooninke soobente
sooninke duntenwe
sooninke du doxotonte
sooninke silaami
Madibiramu Kante

Saara
Ee saara yaxarin sire
Ee saara yugu sire
kooni in deema nan o sooninka xannen ña nanma saanen
A na o bagu sanko yi
Ee saara yaxarin sire .
Ee saara yugu sire .
Maxa in muumundi , in faaban deben ŋa .
Maxa in yaagundi , in faaban deben ŋa .
Maxa in ña soyifon ŋa , in faaban deben ŋa
Maxa in kuma maame liŋoye ŋa .
Maxa in kuma kisime liŋoye ŋa .
Maxa in kuma kallengoora liŋoyen ŋa .
Maxa in kuma kobillenma liŋoyen ŋa .
Baawo .
An da mugu ti : an do sere ñaxa katta me yi , xa ga me mukku xanne yi ya .
Ee saara yaxarin sire .
Ee saara yugu sire .
N tonŋo o xannen ŋa .
Nke na kisi ku yi .
Xa xa na kisi hayibeye yi .
Ee saara yaxarin sire .
Ee saara guyu sire .
N ti : inke yaani lenki badage , xunbane yitte .
N ti : inke yaani lenki renme xunbane saara .
Ee saara yaxarin sire .
Ee saara yugu sire .
Keti xa ma sooninkon mugu .
"I ga ti : gurudan ga na dalla jin ŋa moxo wo moxo , a ra nta ñaana kinen ŋa. "
"I ti : xadi si tu fere tu { hare } an yinme tu fana . "
Ee saara yaxarin sire .
Ee saara yugu sire .
O na me deema .
O na kisi xunbane yaagu .
Xunbane lasamaye .
Xunbane woyinlayi .
Xunbane batuburunde .
Ee saara yaxarin sire .
Ee saara yugu sire .
Nke wa xa mulla nan xoto duna su yi .
Xa xa wa in mulla nan xoto duna su yi .
O na me mugu xan baane .
O kan nan liŋo .
O kan nan deeje .
O kan nan ña horoma ka .
O kan nan ña neema ka .
Nke yinmen na wuti kanmun ŋa .
Xa xa toxon na liŋo .
Ee saara yaxarin sire .
Ee saara yugu sire .
Hari na o kisi xunbqane yaagun ŋa .


Safandaana xaranllenma KAABU TIREERA


safandi koota febiriye xason 27 - 2008

[sumaarenkunda]

xa do sooninkaaxu, na xa toxo sooninkara yi sooninke taxa sankunu

[MARIRENME]

XA DA IN DEEMA ( Au Secours )

Xa ri in deema lemunu
Xirisu xa ri in faaba
Yugo do yaxare xa kafin ŋa
Gundo do bangeye xa da in deema
Sikkaano do taxaano xa da in faaba
Saqaano do xenqaano xa ri ňumi in ŋa
Soro , xa da xa kitte kafi in maxa
Xa yogoni na in faaba ti teyen do nooge
Xa kuttun na in deema ti kanmun do wureedu
Kaaron filli nan maxa boccite o maxa
Lanpuyen maxa kite sakkati ňuxuteye
Nke jikken na xa ya deemande wuron do kiye
Fatanbinara do fatanxullara xa da in faaba
Nke da sinma jalan su na jala baane

Xa da in deema jama
Xa ma a wari ya ba…
Saara yugo ga da i nagaanindi guman saxundi
Xa yaaxe nta saara yaxare ga da i banbaadon buyi
Xa ri in faaba jama
Leminaaxu faayi boccitene marekittu
Saar aga na ti baane , a na ti tanmu
Tuwaano xa ri in deema
Sunpu faayi saqa a ga kori wutunda
Xa da in deema xirisu
Jikke faayi xosexoseene a ga ňana suwa ginon wure
Xa da in deema soro
Yexuni beeni ga tefi sunna do farala kanma
Goron do sappen ga na seedo
I faayi kiiran kutiini killinpatanpancon naxa
Hayibeye ňa suturiye da xonne
Muiňye taanin da a kittun xose
Xa da in faaba jama
Kitti baane ra nta sooxono.
Xa da in deema soro
Selli xa ga da in mugu jama
Ken kun xa ri in deema.

[MARIRENME]

N ŇAXAMALA

Nke ňaxamalan do wandi ňaxamala su nta baana
Na a wutu kinbakka ma kinqenna
Ken do saahelin do banbuuxu
Na a tuguti inke ňaxamalan ni kitaabin kanden ya
Gelli soro fono ma lenki koota ke
Nke ňaxamalan yaani taarixun do xillun kama
Nke ňaxamalan yaani naamen do danben tuwaana
Daaru do daarumen gundo
Lenki do xunbane tuwaaxun xalifanten na inke ňaxamalan ya
Gundo muxunton taaxunten na inke ňaxamalan ya maxa
Nke ňaxamalan ni meselle
Xabiila be yiraame ga na burte , a na a lifi
Sunpu be kaccen ga na kuti , a na a tefu
Nke ňaxamala , sunpu solla
Nke ňaxamala , xatti sorogonda
A ga i ta kiyen do wuro
A ga i neene gundon do bangeye
Kandaaran kiyen towoye nta inke ňaxamalan kabana kaanin naxa terana
Dundo xoore nta inke ňaxamalan kabana telle sunpu do xatti soli
A nta tanpini , a nta ňuxutene , a nta jikkudun kutini
Na a toxo aken yaani sooninkara jikke
Aken yaani sooninkara banbundan sire
Nke ňaxamalan yaani fatanbinnara nimisiwasa

Nke ňaxamalan do wandi ňaxamala su nta baana
Nke ňaxamalan yan katta xiiden bakka in ŋa
Ganbare ke do moolo ku ňiimu nta kutte su toqo in ŋa
Sooninkara na xosi bogu in da kunpa
Sooninkara yugu sirun do sooninkara yaxarin muňaano
Nke ňaxamalan do i ganbarin xollon na daga in sagata ma tuŋa laate
Nke ňaxamalan na ri xiide bogu in ŋa ma gunne saaxa soronbe
A na xiide bogu sooninkara renmun gada tuŋan ňa jikke
Soonikara renmu do butte do waale na saage kaara ya
Gode do tanka ma inke ňaxamalan ke girindi
Xaalisi xulle do kaŋne ma inke ňaxamala ke taaxundi
Na a saxu ke tuŋa nta danbe do xille tu
Xa tuŋa xoore ke wa duwarenme do renbarkinte tu

Nke ňaxamalan do wandi ňaxamala su nta baana
Mexen binnen Kaman ni inke ňaxamalan ya
A ga da dullen do daqun bogu in ŋa ti tongen do fanti
Kafaan do tanmen da in wara kuren kaane
Nke ňaxamalan yaani kaŋne do xalisi xullen ňaxamala
Luliyin Kaman na inke ňaxamalan ya
A na in ňagaari gelli in taani ma in yinme
Xanan do xonnen na suuxe

Nke ňaxamalan yaani biire xooren wure jula
A gada in kaba taaduurun terende
Na in naxaanen siiti ti fatanlappoole
Nke ňaxamalan yaani juburen do dundunŋen kama
A ga na dondonŋen ferenpentindi
N na kori sikki in taanin kanma
Gelli worosso ma lonbi
Gelli yerebete ma koofili
Nke na rege xo jinnanwurunwura
Nke ňaxamalan suugu xanne da xiiden su bogu in ŋa
Nke ga na sanku do in daga rexe
Nke na daga taaxu in ňaxamalan kaara
ALLA gan na inke ňaxamalan toqo in da soninkara noxo

( En honneur à "ma Guessérée préérée ) Mariame SYLLA )

[MARIRENME]

Y I N M A N K A A X U

Yinmanke , ka yinmanke
Yinmanke , kafo do debe yinmanke
Yinmanke , kunda do debe yinmanke
Yinmanke , lemunu do xirisu yinmanke
Yinmanke , yugu do yaxaru yinmanke
Anken yaani yinmanke
Jama do jamaane yinmanke

Yinmankaaxu ,
Senbe do do naabure ga ma kini an di
Yinmankaaxu ,
Faranporoye do do daraja ga ma an toorindi
Lemine do xirise ga da i jikke ro an di
Na an taaxundi tooriye daagon kanma
Yugo do yaxare yan kafi na an sugandi meenin noxo
Sugandinde xuraye sugandinde
xonnaaxu do neqetuntaaxu falle
Mukken do debinlenma ga da i jikken senben an di

Yinmankaaxu , jamaane yinmankaaxu
Yinmanke xo nagaana
An na sigi xo toore
Ma an na saxu xo daago
Naabure do kaawuduntaaxu
Nan maxa an mungundi an layiduni
Darajan maxa bifi an yaaxo
An ga nta xanan do xonnen bakka me
Toore daxanmen maxa sikkan gabondi an maxa

Yinmanke , jamaane yinmanke
Maxa mungu ti an ga fe
An me tana yaani
Yinmankaaxu feti xeye
Toore su ga di xenpa wa di
A ga dalla wo dalla
A ga daxanmu wo daxanmu
Ga nta Kamane Senne ke Tooren falle

Yinmanke , jama yinmanke
Yinmanke , haadamarenmu yinmanke
Likken ga xoto a saxundi
Katta a bicca saxu an kanma
An me nta an faaba renmu a wa di
Xa an me nta duna ken ni fi tana
An ga da an tu bagu jaman di
Daga gelli i ga ma an deni ti roxoye
An falle koyi gelli jaman ga ma i falle koyi an di
Yinmankaaxu feti xeye
Yinmankaaxu feti naame do danbe
Yinmankaaxu feti xille do janmu
Yinmankaaxu ni kuyi , Alla kuye ga ni

[Poete soninke]

Jaabi Duwa ti '' Nŋa telle xara, N telle sanga ''

'' N ŋa telle xara Nŋa telle sanga ''
'' Tuwaano nan gaba x'i nta baana ''
'' Eee.. Tuwaano nan gaba, i nta baana ''
'' Nŋa telle xara Nŋa telle yaala ''
'' Ee.. Tuwaano nan gaba x'i nta baana ''
'' Ndo lemene n gemu kille ''
'' Ndo xaralanma gemu kille ''
'' Ndo Taaliben gemu kille kille ''
'' Ndo Taaliba lenmen gemu kille ''
'' Nti lemine ; an telle minna ? ''
'' Nti xaralanma ; an bakka minna ? ''
'' Nti taalibe ; an telle minna ? ''
'' Nti taaliba lenme; an telle minna? ''
'' A t'i telle moyisin ya ''
'' Moyisin xosa ña xusunkonpe ''
'' Nŋa telle xara N telle sanga ''
'' Tuwaano nan gaba i nta baana ''
'' T'in ŋa telle xara Nŋa telle yaala ''
'' Tuwaano nan gaba i nta baana ''
'' Eee... Tuwaano nan gaba i nta baana ''
'' Xuraane kama Asa faaba ''
'' Xuraane kama Asa sanbi faaba, Sanbi Musa faaba ''
'' Tuwaaxun do barike Haawa faaba ''
'' Tuwaaxun do barike Haawa Sanbi Musa ''
'' O t'a dan kore sidiganke, Silla hooroñamante''
'' Eee... Tuwaano nan gaba i nta baana ''
'' Moodi ndo gundo, Jinme jaaxo ndo hayibara jaaxo ''
'' Moodi ndo jabaru ''
'' Mañaame ga di kitaaben kanma xara''
'' Nan saage n'a noxon xa tu nan kur'a kanma''
'' Eee... Tuwaano nan gaba i nta baana ''
'' Kaŋen xalibe Maasire jagana ''
'' Goden xalibe Maakunyanji renme Maasire jagana ''
'' Moodi ndo soobe... Jagana manga renme ''
'' Deena ndo battu xirisun kori kuuñiinda abada bada''
'' Eee... Tuwaano nan gaba i nta baana ''
'' Nke wa telle xara Nŋa telle sanga ''
'' Tuwaano nan gaba i nta baana ''
'' T'in ŋa telle xara Nŋa telle yaala ''
'' Tuwaano nan gaba i nta baana ''
'' Ndo lemene n gemu kille ''
'' Ndo xaralanma gemu kille ''
'' Ndo Taaliben gemu kille kille ''
'' Ndo Taaliba lenmen gemu kille ''
'' Nti lemine ; an telle minna ? ''
'' Nti xaralanma ; an telle minna ? ''
'' Nti taalibe ; an telle minna ? ''
'' Nti taaliba lenme; an bakka minna? ''
'' A t'i telle moyisin ya ''
'' Moyisin xosa ña xusunkonpe ''
'' Eee... Tuwaano nan gaba i nta baana ''
'' Eee... Tuwaano nan gaba i nta baana ''
'' Iyee... Tuwaano nan gaba i nta baana ''
'' Iyee... Tuwaano nan gaba i nta baana ''
= = = = = = = = = = = = = = = = = = = = = = = = = = = =
Xara Jaabi an da tuwaaxun do tuwaanon sigan gansi.
Na xaranŋe ndo sange n sigan fatta bakka me ya.
Soobe nta sange kabana, xoyi sange xa ga nta soobe kabana moxo be ya.
- Yogonu Moyisin ña xusunkonpe.
- Yogonu '' Moyisin ña soronkonpe.
- Tuwaaxun ya na fo wo fo saarana, xoyi tuwaaxu nga kitene duna ŋalintaaxu ke muuma nsu noxon di moxo be ya.
Tuwaaxun falle fo wo fo su ra nta telle kaane ke duna.
Nawaari jaabi Duwa.

[Poete soninke]

- Jaabi Duwa ti '' MuÑU''
''A ti soro xor'o n muñi''
''Muñun falle ni xeeri ya''
''Ko ni jama xor'o n muñi''
''Muñun falle ni jemu ya''
''Afiriki yugu, xor'o n muñi''
''Afiriki yaxaru, xor'o n muñi''
''Eh, Saasen ga d'in sufa''
''Jaban saasen ga d'in sufa''
''Ati; manen ga d'in kutu''
''Ñenekon manen ga d'in kutu''
''Ko ni jama xor'o n muñi''
''Muñun falle ni jemu ya''
''Ko ni soro xor'o n muñi''
''Muñun falle ni xeeri ya''
''Eh; Muñu - muñun siren ya ni''
''Muñun siren ya ni - Muñun siren ya ni''
''Muñunte ya ni Nan yeere xanma galle noxon ŋa''
''Jamangunmaaxu tonon ni manne? An nan muñi ya de''
''Tunkanyugaaxun nafa? An nan muñi''
''Yaxalenmon pilli tono ni manne? xa na me doro''
''Lenme nd'i saaranon pilli; An nan kanu''
''Xor'o n duŋe me danŋa, kafo naa daga kaane yugu jama''
'' Ati jama ; xor'o n muñi''
''Muñun falle ni Xeeri ya''
''O nan sabari o nan duŋe''
''Muñun falle na xeeri ya''
''Ko ni soro xor'o n muñi''
''Muñun falle ni jemu ya''
''O nan sabari o nan duŋe''
''Muñun falle na xeeri ya''
''Afiriki yugu, xor'o n muñi''
''Afiriki yaxaru, xor'o n muñi''
''Eh, Saasen ga d'in sufa''
''Eh, Lentugunnaaxu na fo xote''
''Jaban saasen ga d'in sufa''
''Eh, Lentugunnaaxu na fo xote''
''Ati; manen ga d'in kutu''
''Eh, Lentugunnaaxu na fo fo xote''
''Ñenekon manen ga d'in kutu''
''Eh,Lentugunnaaxu na fo xote ya''
''Ko ni soro xor'o n muñi''
''Muñun falle ni xeeri ya''
''O nan sabari o nan duŋe''
''Muñun falle ni xeeri ya''
''Ko ni jama xor'o n muñi''
''Muñun falle ni jemu ya''
''O nan sabari o nan duŋe''
''Muñun falle ni xeeri ya''
''Ko ni soro xor'o n muñi''
''Muñun falle ni xeeri ya''
''O nan sabari o nan duŋe''
''Muñun falle ni xeeri ya''
''Ko ni jama xor'o n muñi''
''Muñun falle ni jemu ya''
''O nan sabari o nan duŋe''
''Muñun falle ni xeeri ya''
= = = = = = = = = = = =
- Ke Suuge noxon di; Jaabi duwa d'i xannen katu nan saage na gangon gansi katta haadamarenmu nsu kafumanton ŋa.
Kuud'o nan muñi o nan terinke o nan sabari, O nan saage o nan duŋen me danŋa, baw'o ga ma duŋe me danŋa kafonu ku ra nta telle kaane moxon ma su ya.
A da taali baane katu ken ga ni nan ti;
'' Muñunte ya na Nan yeere xanma galle noxon ŋa''
Toŋun ya ni ken ŋa, bawo beesu wa tu nan ti Naa jibante xamunde xoten ya ni nangalle noxon ŋa.
Hari na o gemundi suuge tana ya.

[Poete soninke]

Sooninkan Suugu nd'i wure safande killen kanma sooninkan xanne noxon di.

Soninkara Jaabi Duwa kamara ti '' FAABAN DANBE''
'' Xa d'in deema o su na me mugu xanne fi gemunte ''
''Xa d'in faaba de o su na me mugu baane fi gemunte''
'' Xoro nan sinme de, O su na me mugu xanne fi gemunte''
'' Saara yugu jama xor'o na me mugu xanne''
''Saara yaxaru jama, O su na me mugu kaane fi gemunte''
'' O na me deema O su na me mugu baane fi gemunte''
''O na me deema o su na me mugu xanne fi gemunte''
''Faagi sanku, O yinme sefen faagi sank'o yi''
''Faagi sanku de , O yinme digaame ngi sanku''
''Laadan sanku O yinme laada ngi sanku''
''I wo maxan lenmuccu, lenmun ku be gi saare tuŋa ŋa''
''I wo maxan lenmuccu, lenmun ku be gi saare gunnen ŋa''
''Lenme tono ni manne? Lenyugunne nafa ni manne?
''Lenme nafa ni manne? Lenyaxare tono ni manne?
''An n'an duu tu, an n'an paaba danbe tu - figemunte ''
''An n'an duu tu an n'an maa xa danbe tu- figemunte''
''An n'an duu tu, an n'an sunpun haqen tu- figemunte''
''An n'an duu tu an na xirisun haqen tu - figemunte''
''Xa 'in deema de o su na me mugu xanne - fi gemunte''
''Eee.. Saara yugu jama, ado Saara yaxaru jama''
'' Xor'o n terinke sefen xoten ya ni...''
''O d'o maani sorogo gelli tugunnaaxun ŋa''
'' N'o faabani sorogo gelli tugunaaxun ŋa''
'' Nan saage nan li gunne saaxa soronbe''
''Lenmun w'o maxa gunnen ŋa, lenmun w'o maxa kaanin ŋa''
''O n'o renmun kanda o n'o renmu nyamari''
''Sere su gaa du diina w'an ŋa''
''Sere su gaa du laada w'an ŋa''
'' Xa d'in deema o su na me mugu xanne - figemunte''
'' O na me deema o su na me mugu xanne - figemunte''
''Saara yugu jama xoro na me mugu xanne''
''Saara yaxaru jama o su na me mugu baane''
''Faagi sanku, O yinme sefen faagi sank'o yi''
''Faagi sanku de , O yinme digaamen gi sanku''
''Laadan sanku O yinme laada ngi sanku''
''I wo maxan lenmuccu, lenmun ku be gi saare tuŋa ŋa''
''I wo maxan lenmuccu, lenmun ku be gi saare gunnen ŋa''
''Lenme tono ni manne? Lenyugunne nafa ni manne?
''Lenme nafa ni manne? Lenyaxare tono ni manne?
''An n'an duu tu, an n'an paaba danbe tu - figemunte ''
''An n'an duu tu an n'an maa xa danbe tu- figemunte''
''An n'an duu tu, an n'an sunpun haqen tu- figemunte''
''An n'an duu tu an na xirisun haqen tu - figemunte''
''Xa 'in deema de xoro na me mugu baane fi gemunte''
''O na me deema o su na me mugu xanne - fi gemunte''
''Xa d'in paaba o su na me mugu xannne - figemunte''
'' O na me deema o su na me mugu xannne - fi gemunte''
''Xa d'in deema xoro na me mugu baane - figemunte''
'' O na me deema o su na me mugu xannne - figemunte''
''Xa d'in paaba o su na me mugu xanne - figemunte''
'' O na me deema o su na me mugu xanne - figemunte''
''Xa d'in deema xor'o su na me mugu baane - figemunte''
'' O na me deema o su na me mugu baane - figemunte''
= = = = = = = = = = = = = = = = = = = = = = = = = = = = =
- Ke ya ni Faabandanbe n suuge be Soninkara Jaabi Duwa kamara ga da suugu.
Nan ti o su na me deema - O su na me mugu xanne - O su na me raga baane - Nan saage n'o renmun xa kanda kuudo ke xanne sanda nga raawa yanbene moxo be ya katta duna gingu ku naxati su ya.
O naa ti hari na badan saqen newondi Jerinte Jaabi da, Hari na arijanna turumullun siranŋu ñ'an da saxura mulle yi. an miina.
Xa renme ndo xa xaralenma ya ni / ALIOU SY SAWANE - Aliou Goundo
N da ke suuge yilla Alaxamisa koota Suxuba fana Wucce 6 noxo - Xasu 6 - 10 - Siine 2010
Geresi Jamaane ŋa, Atiina debe noxon ŋa.
Hari na o gemundi sooninkan suuge tana yillande xurayen ŋa, O na me deema o na suugu ku xa yilla keeta.

[MARIRENME]

Kiiden xenu
Kiidintin xooren xenu
Gajaaga kitaabinkanden xenu
In ga nta mungu do ke tenenŋe koota
Ke tenenŋe do i xibaari ñanŋe
ALLA kiiditin xooren xenu
A xenu misilimaaxu da
Kiiditin xoore be dere su ga ni soora
I ga Innahadama kawandini kiye su bakke

Duna bireyen do kalle
Kallen do bireye ke duna noxo
A ga dalla wo dalla , a riini ya
A ga jowo wo jowo , a riini ya
Ke kalle be ga ma a to ALLA Faare Mohanmadu
A na toqo kan yonkinte xa ?

Alaaji Siixu Buna Tanjigoora
Jinme jaaxon do Hayibara Jaaxo
Saxu an nan xenqe
Na a saxu Kamane tana ma ñi an ŋa
ALLA Tunka Xoore ke falle

Jinme Jaaxon do Hayibara Jaaxo
Tuwaanon nan gaba xa i nta baana
Anken ya ma ti woyile tuwanbalaaxu
Anken ya ma ti woyile xaranbalaaxu
Anken ya ma ti woyile munubattaaxu
Xuraane xana , xuraane gundallenma
Jinme Jaaxon do Hayibara Jaaxo
Xaranyinbu ku wose o da seeda
Moyisi ke wose o da daliile

Tuwaaxun do barake Basiiru faaba
Moodin do gundo Basiiru siren faaba
Tuuma an tuumaraxe
Na a tuguti mexe nta an giriraxe
Sooninkon ti kiyu sikki yaani sere su da
Saare koota , yexi koota , kara koota
Xa Jinme Jaaxon do Hayibara Jaaxo
I ma ti anke
Anken falle ni kiye ya

Alaaji Siixu Buna saxu
Kanŋen xaliibe gumen saxu
Kanxotten wallaha gumen saxu
Luliyin dawa gumen saxu
Jinme Jaaxon do Hayibara Jaaxo
Moodin do soobe
Moodi nuxudun xulle
Moodi sunpu solla
Moodi , misikinaanin moodi
Moodi , tanpinton moodi

Alaaji Siixu Buna Xafiiju Xuraane xenqe
Baayenin ma xenqe
Alitiimenin faaba xenqe
Mukkun do tuŋaarankon xana
Jinme Jaaxon do Hayibara Jaaxo
An da xiiden rondi
ALLA gan na an neema.... Anmiina