Le POEME en Soninke [ SOONINKEN NI ! ].

[kagoro saake]

Anmedi ma wo sira
Yunma ti an da giribe yaxare
Baaba ti an da wanda faaba ka siginda
Nri in mugu in ta batta bati
Ndi an xiri fallanke
Haqili ñaaniyen yan da ña
Siyan yatabare soxodi
Anmedi saake gundanlenma

Gelli gelli katta lenki
Xiyin gunbon gana kara baaba ka ke
Soppa moxon ga ña an da taqe
Haqili ñaaniyen ñan da ken ña
Nri mugi , in ta batta bati

Gonmore ga sogone da kaananke
Sogone Kontintaaxu fe
A su gati woyi xeeri fan xoore
Waran raqe roxoye fe

Nad geese xeye
Geese kontinte xeye
Nti in wa kire mirini
Yugu xooran kire mirini
Nyiiren xirisi
Nwaladen sanku
Nfilinke katta daaru ya
Nyaaxon gomu an wa sira
Njonkoyi katta xunbane
Nyaaxon gomu an wa sire
Nwaqilen do ñaaniye fete
Xuran bange
Nli mugi
Nta batta bati

Nda geese xeye
Geese kontinte ga fe
Yugu xooran geese xeye
Baaba wose geese gani
Nooro geese gani
Kappe geese gani
Anmedi ma giri an nan sigi
Sigi biren kiñe
Ke geese ga nta kuti an falle
Fallanke fati an
Falle yaani an
Yaxaru xa faayi baran faayi


Sanba Denbele

[kagoro saake]

Anmedi ma wo sira

Yunma ti an da giribe yaxare
Baaba ti an da wanda faaba ka siginda
Nri in mugu in ta batta bati
Ndi an xiri fallanke
Haqili ñaaniyen yan da ña
Siyan yatabare soxodi
Anmedi saake gundanlenma

Gelli daaru katta lenki
Xiyin gunbon gana kara baaba ka ke
Soppa moxon ga ña an da taqe
Haqili ñaaniyen ñan da ken ña
Nri mugi , in ta batta bati

Nad geese xeye
Geese kontinte xeye
Nti in wa kire mirini
Yugu xooran kire mirini
Nyiiren xirisi
Nwaladen sanku
Nfilinke katta daaru ya
Nyaaxon gomu an wa sira
Njonkoyi katta xunbane
Nyaaxon gomu an wa sire
Nwaqilen do ñaaniye fete
Xuran bange
Nli mugi
Nta batta bati

A su gati woyi xeeri fan xoore
Waran raqe roxoye fe
gonmore ga ña sogone da kaananke
Sogone kontintaaxu fe

Nda geesen banba
Geese kontinte ga fe
Yugu xooran geese xeye
Baaba wose geese gani
Nooro geese gani
Kappe geese gani
Yaxare sira giri an nan sigi
Anmedi ma sigi biren kiñe
Ke geese ga nta kuti an falle
Fallanke fati an
Falle yaani an
Yaxaru xa faayi baran faayi


Sanba Denbele

[MARIRENME]

Xaranmoxo KAAGORO SAAKE kirallan moxo,
A ga nta an toorono an ra wa a safana xaransuuge ke wure , sere be ga da xaranuuge ke dabari , taatana kuudo na maarenmun deema.

[kagoro saake]

DAARU GAN KATTA ÑAANA LENKI
Ren yaxarin xaran balin sofo:


Daaru gan katta ñaana lenki !
Koni daaru gan katta ñaana lenki !
Walla in gan katta ñaana lemine xadi !
Ganca sere nta in toqo katta xaran konpo
Xaran konpe nafa duuro
Xaran konpe xeeri duuro
Xaran konpe tine duuro
Xaran konpe jomu duuro
An da xara an na tuwi
An da tuwi an na soron tuwindi
An da soron tuwindi
An do baraaje duuro


Gajaaga yaxarun su gana meeñi lenki
Ku beeni ga xara
I na faamuye kita
I na ña kaananko xaranbalinin da


O ku deben soron yoome lenki
Baawo yaxare nta i maxa a ga xara
Yaxare nta i maxa a telle tewe i meenin noxo
Nan butu an saaraanon a dagante ganni
I na butu in ma do in faaba


Baawo inke saaraanon da sinma
Yaxare be gana xara a sankunu ya
He! ke do sankuyen nan laata koyi
Xa yaxaru
Xa kun yaxaru
Nna do xa ya
Xa kun sooninke yaxaru
Nna do xa ya
Kinbakkan sooninke yaxaru
Nna do xa ya
Kinxenna sooninke yaxaru
Nna do xa ya
Saayelin sooninke yaxaru
Nna do xa ya
Banbuxun sooninke yaxaru
Nna do xa ya
Ke be gada inke saaraanon kita
An maxa saaraana su kita keeta.

Safandaana : Kaawu Kamara

[MARIRENME]

XOODA KATTE

Leminan sange
Yugu xooran sange
Yugu sin sange
Jaman sange
A ga duna ban wo ba
Gelli fatanbinnun jamaanu ma fatanxullun jamaanu
Gelli debindaara ma debixooro

Sange daxamunte,sange doronte,haqilantan sange
A ga da sabariye do duuruxotontaaxu ya tirindi
Sange do sowoye kanma
A da haqile sire do mareye ya muuru
Kuudo sangaanon na sanga sowoye noxo
Kuudo faayindaanon na faayindi fo kita
Kuudo kiitaanon na kiiti killen kanma
Kuudo sikkaanon na sgi i sigiraxo

Waxati baane do tanjikke saqa
Sange do sowoye,jamu do xeeri kanma
Fuuren ga fogu wo fogu
An na in faaba xanta in da , a wa roono a noxo
Yanpa in maxa ma tugo jaara
Xa a da butte mura

On sanga , on soyi
Sabariye do mareyekanma
Lenki lemine , xunbane xirise

Alaaji Gileenu NJAAY

[kagoro saake]

[QUOTE=kagoro saake;34193] DAARU GAN KATTA ÑAANA LENKI
Ren yaxarin xaran balin sofo:


Daaru gan katta ñaana lenki !
Koni daaru gan katta ñaana lenki !
Walla in gan katta ñaana lemine xadi !
Ganca sere nta in toqo katta xaran konpo
Xaran konpe nafa duuro
Xaran konpe xeeri duuro
Xaran konpe tine duuro
Xaran konpe jomu duuro
An da xara an na tuwi
An da tuwi an na soron tuwindi
An da soron tuwindi
An do baraaje duuro


Gajaaga yaxarun su gana meeñi lenki
Ku beeni ga xara
I na faamuye kita
I na ña kaananko xaranbalinin da


O ku deben soron yoome lenki
Baawo yaxare nta i maxa a ga xara
yaxare nta i maxa a ga telle tewe i meenin noxo
Nan butu an saaraanon a dagante ganni
I na butu in ma do in faaba


Baawo inke saaraanon da sinma
Yaxare be gana xara a sankunu ya
He! ke do sankuyen nan laata koyi
Xa yaxaru
Xa kun yaxaru
Nna do xa ya
Xa kun sooninke yaxaru
Nna do xa ya
Kinbakkan sooninke yaxaru
Nna do xa ya
Kinxenna sooninke yaxaru
Nna do xa ya
Saayelin sooninke yaxaru
Nna do xa ya
Banbuxun sooninke yaxaru
Nna do xa ya
Ke be gada inke saaraanon kita
An maxa saaraana su kita keeta.

Safandaana : Kaawu Kamara

[kagoro saake]

SONINKAN RENMU



kootan kiñe soninkan renmu
Koota xooren kiñe wagadu renmu
Dinman kiñe soninkan renmu
Giri dinman kiñe wagadu renmu


On sefe doome soninkan renmu
O na me anniyun tu wagadu renmu
O na o kittun kafu soninkan renmu
O kittu sennon kafu wagadu renmu
O na o senbun kafu soninkan renmu
O senbo xooron kafu wagadu renmu
O na me deema soninkan renmu
O na me deema wagadu renmu


O na o xannen xara soninkan renmu
Soninkan xannen xara wagadu renmu
O na o xannen xara soninkan renmu
Wagadu xannen xara soninkan renmu


Xotan ga bange soninkan renmu
O na me deema wagadu renmu
o me nta me da soninkan renmu
O me nta me da wagadu renmu


O yaani saaxa baane soninkan renmu
O yaani faaba baane wagadu renmu
O yaani jomu baane soninkan renmu
O yaani xeeri baane wagadu renmu
Hasidaaxun maña soninkan renmu
Besenxonnaaxun maña wagadu renmu
Dunderaaxun maña soninkan renmu
Tinmantaaxun maña wagadu renmu

Safandaana : Kaawu kamara

[MARIRENME]

NKE YAXARE

Gelli an ga da a mugu ti inke yaxare ya ni
An ti in da nafan roxe
Nke yaxare xa bogu anken ya
An yan da an janmun ro inke yaxare
Anken yan katta in ňaana nafan roxe
Anken yan katta inke yaxare ňaana barikinte
Nke yaxare da a wari dooren xayen ya ga tegene
Nke yaxare da a mugu ti sollen xayen yan guubene
An ti inke yaxare da wandi faaba ka siginda
Nke yaxare ga nta ka su …
Ka kontinte , Ka karante , Ka nooninte
Seliŋun kasankasanton na kira jagandini
Nke yaxare da an minindi an ga daqu
Nke yaxare da an yigandi an ga dullu
Nke yaxare da an laabandi an ga mexi

Gelli an ga da a mugu ti inke yaxare ya ni
An ti in da xibaare gabe gume
An xa ga tinme su ALLA do inke yaxare do i yaxaraaxu
Baawoni inke yaxare ňa an da haqile fillandi
Nke yaxare ňa an da ta nooge do kitte nooge
Nke yaxare yan katta an barandini an fi duŋanton su
Nke yaxare yan katta an taŋandini an fi baranton su
Maxa inke yaxare ňa ňaagaare
N ga na dalla an yaaxo inke yaxare ga in tu bakka an ŋa
Teyinne na ri , teyinne do i teyinne na ri
Maxa ti inke yaxare da nafan roxe
Na a saxu inke yaxare baane yan katta xasu kabi muňini
Koota su do i toora , kiye su do i tooxe
Xaso su do i mameye , wuro su do i joote
Ma kallen do bireyen naxan koota

Sinme nan ti inke yaxare baane yan katta ňaana an da
SAAXE…BAAYE…GIDAN YAXARE…YAQE…GUNDALENMA
An ga ma inke yaxare doro ti foofo
An na inke yaxare doro ti ALLA ga da inke yaxare doro

Alaaji Gileenu NJAAY ( en hommage à " Ma Hayirankée ")

[MARIRENME]

M I S I L I M A A X U

Lafajirin kaanaanen joppe saanun sanqini
Xenqon liŋo waxatin dinma
Seyitaane ga do I ta ban wo ba
A ga nta jiitini ku yinmu
A wa malini ku taani
A ga ma kori , I na Inna Haadama lanpundi
Katta KAMANE Kalanŋunten xirinde

Xirindaanan ro ka sennen noxo
A taŋa katta kinbakka late
A da I jon koyi Alikaaba sennen ŋa
Na i xirindi xannen wara do lafajirin fanki mulle
Nan xirindi katta ALLA Tunka Xoore ke
A ti : ALLA YA NI TUNKA KE BE GAN DARA
KAMANE TANA SU NTA YI ALLAHU FALLE
MUHANMADU YA NI ALLA XAYI FAARE
XA RI KATTA SALLEN DI
XA WURU KATTA XEERIN DI
ALLA NAN XOORA , ALLA NAN DARA
KAMANE TANA SU NTA YI ALLAHU FALLE

Ke xirindi xanne tinte, ke gangundi xanne laate
Xan xoore , xan liŋe , lagari xanne
A sanqi do lafajirin kaanaanen batte
A wuruge jongun do sankanconi wure
A mugi gunjeeron do seyin xullun bero
A gad a misilimo beeni ňi saqa
A su giri nan sigi xo Saama sigen koota
I da sallijin wutu nan fanpe katta ALLA Ka senne
I ro yiran xullu xo furen do I kasanke
I da sappon sigindi
Na I teleŋondi xo kuren ga na ňi I yinmen taaxunu gajanŋe
Kunke do kunke , ta do ta
I teleŋo katta Alikaaba xo sere bane
Alimaamin ware kaane xo lendujaaxe
A da Kamane Kalanŋunten gangu ti A Tunkaaxu
Sondonmun do haqilun su miije katta xunbane

I sigi , I jimi , I tusi na I yinmun tukka ňiiňen ŋa
Nan seede ti ALLA ni Baane ya
Kamane tan su nta I ya ALLAHU falle
I da salle ke ňama ti kuuňindi xerexerente
Katta Malakiyanin filli , teyen do nooge
I ga ňaana I da xunbane seedo

Safandaana :Alaaji Gileenu Njaay

[MARIRENME]

JAMU ( la paix )

Jamu , jamu duuro
Jamu , jamu do xeeri
Nke ra nta bireene jamu falle
Jamu , suxuban do lelle
Jamu , kiyen do wuro
Nke na jamu ya ňaagana in salle su tebe
Jamu do xeeri, nke do in dunkoonu
Jamu duuro , nke do in taaxallenmon naxa
ALLA gan na jamu do xeeri fanken ritini
Jamu do xeeri saara do renme naxa
Jamu duuro , yugo do i yaqen naxa
Jamu , faaba renmun naxa

Nke na jamu ya muurunu yillekereye su
Nke ra nta yigeene jamu falle
Nke ra nta xenqene jamu do xeeri falle
Nke ra nta gollini jamu falle
Nke ra nta tuwiini jamu duuro falle
Jamu do xeeri , an na minna ?
Jamu duuro , an xa ?
Nke nta tanpini
Nke nta ňuxutene
N ga ma jamu ya wori falle
N ga ma jamu ya kita falle

Jamu , jamu do xeeri
Jamu , jamu duuro
Nke na jamu sirowun ya ňaana tuuma raxe
Nke ga na sanku
Nke na du wara do jamu fanke
Jamu , an na minna ?
Nke na jamu ya batta
Jamu , an yaani inke xana
Nke ga na wundi xenqo
N ga ma jamu do xeeri wori
Nke na lasame , lasamaye fataama

Jamu , jamu duuro
Jamu , jamu do xeeri
Nke ga na jamu kita in kitte ke
N na jamu tunci kaanin do konpon noxo
Nke ga na jamu raga in kitte ke
N jamu taaxundi debun do jamanun noxo
Jamu , soxaana do naaburu maraana naxa
Jamu , fankama do misikiina naxa

Jamu , jamu do xeeri
Jamu , jamu duuro
Nke na jamu ya ňaagana fatanbinne do fatanqulle naxa
Jamu , misilime do kaafiri naxa
Nke na jamu ya muurunu yugo do i yaqe naxa
Jamu , renme do saara naxa
Jamu , kinbakkan do kinqennan naxa
Jamu do xeeri , saahelin do banbuuxu
Jamu duuro , kanmun do ňiiňe
ALLA gan na jamu do xeeri ňa gunnen do kaanin noxo
ANMIINA YA RABBI