XONNE XOTE

N da kinbakkan do kinqennan tera
Nkori in xonnen walla
Na saahelin do banbuuxun wura
N konto in kitten saqa in xonnen kanma
Wuron do kiyen ga do in ta
Suxuban do lellen ga do in raqe

Nke daga in xonnen muuru faabarenmun noxo
Nke kori a walla in yaaxe
N daga xonne xote tijje baayirenmun kaara
Sere ma danginte wari sakkati a riiyinte

Xonne , an ro minna ?
Xonne xotte , an ro minna ?
An da in kaba yigeene
An da in kaba minni
Nke nta xenqene , nke nta tiigono
Nke nta tanpini , nke nta ňuxutene
N ga ma in kitte saxu in xonnen kanma

Yaaxe be ga na in faayi
N na ti xonne xote
Kitte be ga na in nooro
Raqe be ga na in ko
Toro be ga na in terinka
Nke na ti xonne xote
Ta be ga na in tera
Haqile be ga na in sinma
Nke na ti xonne xote

Nke da duna su ňa xonne
Duna su ňa in da xonne xotte
Faabarenme do saaxarenme, xonne xote
Faxarirenme do kaawurenme ,xonne xote
Taaxallenma do gundallenma,xonne xote
Sunpu do xatti , xonne xote
Nke ňa du da xonne , xonne xotte
Nke mungu nan ti xonne wa sere ya
Xonne xote wa sere ya
A ga ma ňa haadama renme

Nke finki , nke muumu
Nke lungu , nke muruxu
Nke haqilen da i falle koyi
Watte da in wutu,a do in daga
Watte ti ike ya ni haadama renme xonne xotte

ALLA gan na o kisini watte
Watte , xonne xote.