Ke siine muuma in ma ma yonki saha kita , waxatini yogoni in ga na in ma wori in yaaxanjin na ri in yaaxo. Xa in ma na sere ya a butten xotten ga ni moxo siri; yonki ke ga ma fogu sahan di moxo su , a nta du toqo watten maxa , a nta duŋeene saqa bire su , ma a gada fo kita a ga i kitten roono ayi.
N wa tu ti a tanpi watte ke maxa xa ken do i moxo su , a nta mulla o ga lasamene , inke ma yaxarin duruxotonte wari na in ma baga. Hari in ga na ti a nan tuuma , inke ra wa sikki do gollu ku su , an na a mugu :”watten kanna sere be ga ma du toxo a maxa ya… in ga na toxo saqa watte ke fesene in ŋa ya …”.
In ma da jaarandaanon ku su wura , fatanbin yittun do tibaabun yittu ; ken su o kori in ma nan faso. Lagari in ma ntaxa bakka kan noxon ŋa. O taaxallenmon wa riini a xanta koota su , yogoni do yittun wa riini , a na wanqi ti i yogoni , a na futaadi ti yogoni ma xa a na i yogoni mini. N xoxonon xa joppe a tuunu ti in ma ma selle sire , Birante xa ntaxa laatono ka ke , a baane yan saage telle gunne walla tangi rexe , hari a ga na daga a ntaxa dalla xo fanan moxo.
N yan telle jaagundi a batte kafiini soroyen do kaadungollu tanani , ALLA siro in xoxonon joppe xoorono , i wa in tuumandini fiini yogoni.
Birante xa ňa maxanbane , a sigi ti teeni ku su golle na a wutu yillin teenin do tigan teeni kafiini folon teeni. Birante wa ňaŋana telle gori fanŋe walla a na daga xaňe , a kitti duuro ma ri abada ; o do o kame misikinaaxu , o nta telle sere ňaaga fo , koota o na yaraxata sonbin xulle hari xatti do sukara g anta ayi ma xa o na ňaaxama futun xeccan do sappiji . N ma do kaba tanbo wutte , bire su a na ti : “ Hoore ga nta yaagu mulla , a na du koroosi tanbo wutte. Sere sire nta i bireyun fuŋoono i kiteyun ŋa.

Ken koota watte ke da in ma tanpindi buru , a koota a ra nta hari digaamunu , an ga na digaamu a da , a nta an mukku ; in da in butten xotondi moxon su xa in kori in yaaxanjiini ragana , in ti lemunu kun daga taaxu i konpe . Birante daga daga debegumen xiri , sere sire ya ni , gelli in faaba ga bireene a ňi riini ka ke , i ga masalanŋa wucce muuma ; hari in faaba bono falle , a ma o wara . Waxatini a na ri , a na in ma falla tiiyin saada walla talinfeqe kaawanto.
Debegumen ga joofe , a gad a in ma wari moxo be , a yinme kanu xa ken su a da o butten xotondi , na o kiilun taxundi . A daga i ka na i si yugu fakkan kini i renmen ŋa ti an daga a ko in ma kaacin yugon da , ti in ma ma selle , a tanpi buru , a ga feere su dabarini a nan ri jowoye maxa , a do tibaabun yittu xa na ri.
Debegumen renme ware kille non do no , a ga na ňi joofene katta laxasara salli falle ; inke yinme kori foofo ňaana , in kori laatono in ma ya , in daga taaxu a yinmun ŋa na a yinmen jogi in taanin kanma ; in sondonmen noxo in wa ALLA Tunka Xoore ke ňaagana A gan na in ma bakka ke watte noxo , A gan na in ma wuyin fuutunu , A na a toxo wure …
Birante ri sigi in kaara , a da i kitten jogu in kunken kanma , a ti in da : “Taata Sira , an kiilun taaxundi , wuye ke nta foofo siroono . O na ALLA ňaaga , A baane ya ni hadama renmen do watten su kama , watten ga xoto wo xoto , a ga mame wo mame ; on maxa o jikken bogu ALLA. O faaba ga bonno a ma wati hari koota baane , xa ALLA ga kiiti nan ti a wuyin xenpene non ya , a ma dangi no ; an butten xotondi ALLA ga na duŋe ma o ma ga bogu ke watte noxo , lemunu ku ga na an wari ke moxo i xa lasamene ya.”

Debegumen renmen dagayen falle a nta dangini waxati baane , o da a wari riini a do i si.

Birante ga in ma kaara konpen noxo , in da a gangu ; debegumen renmen da sin sigindi gallaqe na yetu sangallin tonte.
N siginte ke an tini in taanin faayi bakka in wure , kuruma in mali biiren sole ; a taŋa katta Birante , a ti : “ in yille ti in falle woyiri in faaba Muusa gemu killen ŋa , a ga riini debe ke , a ti i da an ma sahanbalaaxun mugu xa yere xaaxudun terenden nan xoto i maxa”. O ga ken noxo , in da in faaba Muusa hayina riini a do i sareeti.
A ga joofe , a taŋa katta in ma ya xuben noxo , a da Birante xayi ti an daga debegumen xiri i da . A do debegumen da me wari , a falle a da in do Birante xiri , a ti o da i wa mulla na in ma deni fanxanne ke debi xoore woyiri in ma ga moxo ke be a tanpi , doono tubaabun jaareka xoore wa non ŋa , i ga ra wa in ma jaarana ma a ga selle.
N da sinma a tini in na in moxo gemundi in do i na daga doome xa a ti in nan toxo lemunun kaara na a tuguti Birante ni yugon ya , a bane r anta sikki do gunnen do kaani.
N ro konpen ŋa na in ma yiraamun ro fudin ŋa , debegumen do Birante do in faaba Muusa da in ma bagandi konpe na a saxundi sareetin kanma.
N kori in yaaxanjiinin ragana , a toxo in nan luuke bane ya ; kuruma debegumen ri katta in ŋa , a ti in da : “ Sira ! an na ALLA ňaaga , an fasu wuye ke , anke gan ňa kundu , an xoxonon ňaana mendu. An ma telle jaare baane ya “.
Sareetin janbandi ma a ga bakka o yaaxon , in do lemunu o ro biiren wure ; taaxallenmon ri o butten yanqandi.

( à suivre )