POEME pour Soninkara.com

[Poete soninke]

'' Ko ni niame ? ''
N d'in xanne katu xadi.
Nti ko ni niame?
Nke ni sooninke...
Nma ni sooninke...
Npaaba ni sooninke...
Nke ni niame.
Nan saare niame.
Nan xooro niame.
Nan wundi niame.
Ko ni niame yi lenki?
Sooninkon ti '' Renme be saarano filli ga ni janmu baane; ken ya ni niame''
Nke ti '' Renme be ga saare n'i saarano xanne ko ken ya ni niame ''
Soninkara ni niame.
Soninkara guja ni niame.
Faaba n xanne koyindaana.
Saaxa n xanne jagndaana.
Soninkara guja xoore.
Sooninkon wallaha xoore.
Gelli fanxoore ma faransi.
Gelli kaara ma gunne.
An do toxon daga.
An do sooninkon toxon daga.
Toxo gemunto.
Toxo darajanto.
Toxo faranparu.
Soninkara.komu
Soninkara ti yinme xanne.
Soninkara ti i xanne ndo wande.
Ke xanne do xannun tananu.
An liyen siro faransi.
An giri fanlenme; an li fanxoore.
Anke ni fanxoore; an nya geeji.
Kunbi sooninkon; kunpa bogu.
Kanta sooninko; kanta sigi.
Wagadu sooninko; wagaaxun tonte sigi.
Sooni sooninkon; sooninkaaxu guja n faayi.
O danbe - O diina.
O xille - O xanne.
Ko ni niame?
Soninkara ni niame.
Sooninkan xanne ni niame.
Sooninkan xanne sanda setu.
Sanda duumante.
Sanda wuruginte.
Sanda giyante.
Gelli daaru ma dakaaru.
Soninkara kingu xooro.
Gidimaxa do Gajaaga.
Jaafunu do jonboxu.
Mali do Muritaane.
Soninkara danma.
Senegaali do Ganbi.
Soninkara ti danbe.
Soninkara ti denme.
Soninkara ti xanuye.
Soninkara ti xiiden bogu.
Gelli siina xoora danginto.
Xiidi bure nga ro ke xille di.
An d'o banbu; an d'o sugundi.
Konbo ta baane...
Wandi renmu ndo yinme renmu.
Na wandenu sugundi.
Na yinme renmu neene.
Na wandenu wundu.
Na yinme renmu sugundi.
An liyen siro gunne...gun xoore.
An liyen siro kaanu...ka xooro.
Daqun ga n'o raga o na sonikara guuga.
Xiiden ga naa ro o na soninkara faayi.
Banbuda n sire.
Sugundan sire.
Koyinda sire.
Gundanlensire.
Menjansire.
Teralensire.
Soninkara an ti battu.
An ti diina senne.
Na soninkara fi xasun jaga.
Nan saage na yugun sigan wundu.
I kara ya; x'i ma tanpi xafu.
Sooninko bera xoore.
An da soninkara wundu.
T'an xanne t'an neene.
Xarawundaano bera.
Xaralenmu bera.
Suwanwaano bera.
Muurundaano bera.
Jagandaano bera.
Tuwaana xooro bera.
Tuwalenmaaxun bera.
Sunke ndo suxuba noxon di.
Yillankaro ku tanmi su noxon di.
Soninkara ni niame.
Soninkan xanne ni niame.
Soninkara banbaado.
Lendujaaxasire banbaado.
Xati nwa turunba nwa; xati duuro fe.
Kacce nwa yaafe nwa kacci duuro fe.
Kiide ni yitti salaqe; saloxoye duuro fe.
Banbaado gan na banbi maxa.
Bande nta baana terene.
Xati nwa sunpu xati duuro fe.
Soninkara gujan feti guja duuro.
Xanne koyinde guja.
Guja barikante.
Guja xoore.
O d'an xanu ti xanne su.
O w'an mulla ti mulloye su.
O wa d'an batte batu su noxo.
Oku niame; oku xanne ni niame.
Oku saage nan nia niaame.
O xanne nga bogu soninkara.
O xanne nga sanqi soninkara.
Sooninkan kafonu seede.
Feddun wa duwanna an da.
Sooninkon wa d'an batte.
Sooninkan lenmu sewo; sewoye xenpa.
Sooninkon dindi xoore.
Sooninkon kora xoore.
Sooninkon guja xoore.
Nke ti an ni niaame.
Nd'an xanu xiide su noxon di.
N d'an wari ti wari yaaxe su.
An saxura d'an sigira siro.
Gelli siina danginto.
Gelli ku siina xooro.
Guja xoore; geesunda xoore.
Mali ga marenmaxu noxon di.
Senegaali ga sewoye noxon di.
Muritaane ga muunyeye noxon di.
Ganbi ga gansinde noxon di.
Gangon bera; Gansinde bera.
Dangon bera; danbisire bera.
Niaame taax'an ka xoore.
Niaame taax'an kiina ka.
Niaame taax'an faaba ka.
Niaame taax'an danbe xuraye.
An na danbigumun geesu....
Soninkara.com: ni niaame.

[Fodyé Cissé]

Xaramoxo, nawari !!!!

[MARIRENME]

Asalam,
Xaranmoxo nawaari ti ke xaransuuge daxanmunte be an ga da taaxu SONINKARA.COM , Alla gan na tuwaaxu ke jiidi haqile senne noxo.

[sumaarenkunda]

xaran suugen gemu buru harina tuwaaxu ke jiidi na sooninkara deni kaane