D O O K E ( doore )

Dooke do i ke toxo xoore
Nke ga dooke mukku
Dooke do i ke toxo liŋe
Nke ga dooke xiimana
Dooke do i ke toxo darajante
Dooke ! a su ga wurunu katta dooke
Ku ga ma kulumu , ku na bilinbili
Ku ga ma tere , ku na du wara do sappin fanŋen wura

Nke ga dooke toxon mukku
Ma in ga dooke hayinana
Nke ga dooke sinmana
Ma in ga joofene dooke
Dooke do i ke naaburu xoore
Dooke do i ke wulliye xoore

N ga da in fudin taaxundi dooke
N da kaagun yugon ňi yiraamen siitini
Na a siiti ma a ga da sooti i nooge
Nke ga joofe dooke
N da kaagun yaxaren ňi wunu tagillen rondini
Ma a ga da i naxaanen siiti xo kiineyun bununbuna
N ga joofe dooke
Nke da maranbalaaxun fataama ňi lendunjaxaaxu maxa
Baaba ga na ti baane , Hanmadi na ti tanmu
Saaxe ga na ti fillo , Sira na ti tanpille
Xudunmuccunde do jandilande da i tooren tonto dooke

Nke ga joofe dooke do i ke toxo xoore
Nke ga kiňe dooke do ke toxo liŋe
N da sooninkan renmen ňi balla i xanne
N da sooninkan kisimaren wurunu i xanne
Nke ga kiňe dooke do i ke toxo darajante
N da sooninkara laadanin do a xille
Sooninkara naamen do a danben ňi fittene
I sanqi do killinpatanpancon naxa
Jin wura mexinton do i tunni ňiiňen wure hari abada
A ňaŋi in da lasamaye
Sondonme xawoyen da yaaxanjiini kiňa sinqe

Nke ga kiňe dooke beran ŋa
N da yexi yaxare wari bakka yexi yugo konpe
Gelli sellin fanon sefe xanne
Ke yexi yaxare ga fanpene do naaburu muuriye
Na yexu munnafa toxo saqa yexi yugo falle
Yexu , sunna do farila yexu
Ke yexi yaxare da dooke ňa Alijanna
A da baaden ňa ňaxa
A da ňaxan ňa bonondinde

Nke ga joofe dooke xuran ŋa
N da kaagun yugo ňi
A ga da i falle koyi lendunjaxaaxu
A ga na bogu yexi konpe gelli lafajiri
A nta saagene ma wuron kanaane
Ke kaagun yugo ga do sin xoqun ŋa kunmun noxo
A ga ti , in nta fateene ku siinu ya
Ma i gan da xarabun ro ku siinu xoqu
Walla ku siinu na xaraben ro a raqe
Ku siinu na daga na toxo kunmen raqe
An na a mugu ti : « sikkandi ke yanda in firi…
Karagandi ke yan da in juwa…
Filla ke ya ma ri ti i moxo…
Kooni yugo ke , ku siinu wara , siinun na an wara !

Nke ga kiňe dooke
Dooke do i ke toxo liŋe
N da yaxaren wari
A ga da i kiina xata bakka kan noxo
Na i xana yugon bisimilla saxurexen naxaane
Nke ga joofe do i ke toxo darajante
N da yugon do yaxaren ňi
I ga renmun saarana ti xaalisi liŋoye da
Kaanin na tege ti ku xaalisini
ňaagaarun na xobe ti ku xaaalisini
Makka dagayen paasin na bogu ku xaalisini
An na renmun taaduron ňi tereene
An na renmun noxoduuron ňi saqa
An na renmun do i mexe gotten ňi yiilene kundan noxo
Renmu sikki ma naxato konpo baane
Renyugu do renyaxaru konpo baane noxo
Ku renmu ga ma ňa fo
Kaagun yugo na ti : Yaxarin buru renmu !
Kaagun yaxare na ti : Yugu buru renmu !

Sooninkon ti : An ga sanku do an daga rexe , yille do an giri rexe…
Nke yille ti in falle
Na dooke toxo dooke gumun maxa.