SAARA XANUYE

N bangeye duna ya
ALLA Tunka Xoore ke falle
A sababun na in saaraanon filli ya
Baanen da in yinmen si na in ku toxo do janmu
A da in mara maralenme wure
Na hooraaxu do seraaxu toŋo in ŋa
Na sunpusolle doroke rondi in ŋa
N do a ga yiilene xabiilan noxo
Aken yaani in faaba , faabandan sire

Baanen xa da xasu kabi tooran wari
Kiyen do wuro , suxuban do lelle
A da i yonkin wara jellenjellene bireye do kalle naxa
Kiye muuma , waxati muuma , wucce muuma
Ma Alla Tunka Xoore ke ga inke do aken su kisini
I ti ke yan da taare baga
A na in birandi ti konbon xatti senne ke
A na suugu in da xo jaare yaxare
A na in tanga jin do yinbe
Ma in ga in teyen do in noogen bakka me
Aken yaani Saaxe xo saxiiro

Ke yan sigi inke ga da Saara doro ma in doronme
Ke yan sigi inke ga da Saara xanu diinanta duna foofo

Saarana xanuye jere inke da
N nan xara xo Makka Alimmaami
N nan tuwi xo Tuurisiina Tuwaana
N sallitebe su
N siginte , n jiminte , n taaxunte
Nke ga duwanŋa in saaraanon da

Saarana xanuye jere inke da
N na Ganda Faadiga ganbaren wutu
N na daga taaxu Xaayixoore saxan naxaane
N na kira in saaraanon jakkini ma in xoren gan saale
N wuyi saaraanon tiigana ma in kittindoronmun ga kuti
N na suuxeyen ro renmen su sondonme

Saaraana xanuye jere inke da
N na ñiiñanxotte ke ña kayitidere
N na kayin sollen ña xaliibe
N na xaransuuge safa in saaraanon da
Xaransuuge , a ga kuurene abada
A ga sanqini xo fanke duna kanpo ku naxati naxa
Duwa renmen ga a ñaana safaye
Barikintan renmen ga a ñaana fanqe baaxa
A ga du jakkini ti ayi meenin jo

Saaraana xanuye jere inke da
N na in yinmen taaxu tuuren ga gunne
Tuuren do i sigan do i fanka
Nke na karaanen fana ayi
N ga nta a walla ma in gan da a fanqa
Dullunton na a tiiyen yiga
Senberaloxon na a faten xufu du ya

Saaraana xanuye jere inke da
N na daga taaxu geeji raqe
N do in xaranme ñegunte
N na a kira a jin minni
N na wuyi a jin minni
Ma a gan kaawa xa kosi
Nke na xaxasoyen bogu sondonmen su
Nke na a tuwindi haadama renmen su
Nan ti : O su ni Alla Taganta fo ñiiñe ke kanma Hari o ga nta baana

ALLA GAN NA NEEMA KINNI IN SAARAANON DO SAARA FUREN SU...


ANMIINA