Citation:
O sinmawun
Man da sooninkara kita, ho da sooninkara, ke be ga do o su ya, o na ti xadi ho ma sooninkara kita, kallen ni tage xannen ya. Birayen hutten ni kallen ya. O ga ma bara riye, o nmaxa bara saagayen ƞa. O kanna kalle ti mani ho ya ? xiide ke ya ni ba gelli denmaallemaaxu saabu da ? Ganda ken da i kattan katu. Kalle ke da Xillun do danbun firi.
Ganda da bippun do jamaanun tinkondi, a da giya ro sooninkaaxu, sooninkanjamaanun da me talla tu. Yugu siren ya na yugu sirin dinmen tinme, yugu sirin ya na yugu sirin digaamen koono. Alahajji Ganda yugu siren ya ni. Ke be ga da o tanpindi lenki, ken ni wariyaaxa buru, i ga da sooxiyen rondi batiyen do wulliyen naxa, i ga da noogintaaxun ro geesunden do daganayekaanayen naxa, i ga da finkun ro xurandi. Sooninkaaxu heti noone : na i wulliyen yinbun ñoxu ti Karo ma Jaru, ke ni na i seraaxun ya tinmandi. Ku xa na ti ganbaren kabanten ya ni. Ke be xotten ga ni kenni sondon siraaxu, tawhiidi ke sabatinde o sondonmun do duume gollun di. An ga na an diinan wara, an na wondi diinan ya wuttu. A ga na an laadan wara, a na wondi laadan ya wutti, a ga nta an danben tu, a na wondi danbe ya wuttu, a ga nta a xannen konno, a na wondi xannen ya koono. A ga nta a ñiimun terinkana an birene wondi wulliyen ya.
Ganda sigi sooninkaaxu da, a sikken da o kiña o taaxuraxo, a ñiimu do o tintondi o danben ƞa, a da o deema o laadanun do naamun kisini. A ñiimun da o saagondi, i da o xiidi hata, i da o wulli, o xanuyen kugu katta o xannen do o xille. Ganda ma taaxu a ga ma Alla tiiga, ma ganda ma koyi o ya Baaba Wage ga da Xoroboto Muusa rondi diinan di, maraha ma kati, donqo ma ña. Fadiga, nawaari, an saxu. An saxu xo Idi Binta Ndongo ga saxu, an saxu xo Waaly Sumaare ga saxu, an saxu xo Aamadu Tuure ga saxu. An ñiimun da sooninkaaxu banbu xo Jakson renmen dinmu ga da hatanbinnaaxun do haadama soni ti bansiren ƞa. Ganda, hisiru do yaaxanji, Fadiga hiburu do yaxanji. Sorofara koota, minnen ga na wajabi an ƞa, an na sin yinten do sere horen ya leexunu kuudo minnen na kato ñaana, saagoye ga nta ñi geseraaxu di o nta sorofara danqanaaxun kitana. Ho ma Ganda kita, Faadiga.
Cerino Tanja