Sooninkara yaaxaraxurayebe ga dabari Nuwakucoti Moritaani jamaanen ŋa

 Imprimer 

Ceexu Sidiya Tanja ti : O na mulla ke yaaxaraxuraye ke dangi falle , na kapalenmaaxu xoore ro duna sooninken su me naxa,
Anken Ceexu Sidiya Tanja be ga ni Muritaani sooninkon yinmanke , a da Alixibaari tirindindun jaabi bito sikki kaane katta yaaxaraxuraye ta sikkandi ke bicca joppe.

Alixibaari : Kan jamaanu xan riini tewe yaaxaraxuraye ke ?

C.S. Tanja : Jamaanu beenu ga riini tewe yirigin yaaxaraxuraye ke , kun ni : Senegaali , Maali , Nijeeri , Koddiwaari , Kanbi do sooninkara saafaraano beenu ga Faransi , Ameriiki , Esipaaňi do Misira ( Ejypiti ).

Alixibaari : Xori yaaxaraxuraye ke baane ra wa sikki o sooninkan jamaanu do jaman falle sooninkon ku ga ra wa gollini doome ?

C.S. Tanja : Ken baane ma wose , na a saxu gollu xooro beenu ga sooninkon kanma. Ganta ke yaaxaraxuraye sababun wa sikki na tonte xote sigindi , a ga jokkini do gollun kutte.

Alixibaari : Manne xa na ke yaaxaraxuraye sikkandi do ta ta danginto ku bakka me ?

C.S. Tanja : Yaaxaraxurayu ku filli beenu ga dangi , i ňa ňaxa duuro ya. O ňi me walla masalankillu kanma , xa o ma ňi foofo safana,
Ke kille , o na mulla ke yaaxaraxuraye dangi falle , o na kapalenmaaxu xoore ro duna sooninkon do me naxa. Ma ken kapalenmaaxu ga sigi do fiinu gabo xo fedde xoore ga sikki do Kunbi Saale taarixu , a ga ňi Gaana tooren noxo , ken do kitaabi dabari dingira do muurundu sooninkara do sooninkon noxo.
Baawoni hari an da lenki , safande gabe nta sooninkon kanma. O sinmayu maxa ma o ga katta haqili faraaxuye gabe dabarini o do xabiilanu tanani naxa ; na a saxu o taarixun noxo , o sigiran ŋa Gaana tooren noxo ken do kapalenmaaxu o do xabiila kuttu ku naxa gelli ken kiye.

 

Alixibaari : An sefe sooninkaaxu jikkunun kanma , kun ni kan jikkunu ?

C.S. Tanja : Sooninken ni sere ya , a ga da du baga , a ga ma haaji wandi xalle. Dukoyintaaxu fe , Sooninken wa yaagunu i ga tini a da fayaana , sere kallaana , gaarante , diganfillo konnaanama xa kaafiri. Ken yan sigi , sooninken ga sigi noqu su , i ga tini : sere soobe , duroxotonte , kdm...
O nan fatanta ku ňanmoxoni do ku jikkunu ya tangana , na i duumandi du maxa.

Alixibaari : Xa ga na sooninkaaxu wara du kaane xori xa nta xabilaaxun roono xa do xabiila kuttun naxa , katta sooninkara jaman baane sikken leeleyen ŋa.

C.S. Tanja : An tirindinde ke nan liŋo in da moxo siri , na a saxu , n kiilun daga do Gaana toore ke ya, a taaxumoxon ga ňa misaale xoore ti dagamoxo , tangeyun do kiteyu.

Ku ňanmoxoni siginden dalla duumene siino gabo. Gaana tooren noxo , xabiila gabo ňi bireene me kanma jamu do xeeri noxo. O sinmayu maxa sooninkara ken ňanmoxo ra wa ňaana misaale , xabiilani ku ga katta bireene me noxo.