N KITTEN D’IN YAAXEN KARA

N kitten d’in yaaxen kara
 
N kitten d’in yaaxen kara ti ke taali yi
Taalin wuren ma faam’in maxa

A n’in da dagaye yi saagayen nta ke be falle
A n’in da jooroye yi , tuwira nta sere be yi
Ti a su nda ni turunxaasana ; ti turunxaasa d’i ya ,
Ti xa a su wa turunxaasana an ken baane w’i naxa sugunxaaseyen ŋa, I na xusi an yiga
O turunxaasayen na terenden ya yi.
Terenden ga lino sere fanon ya ti kitayen do tuwaaxun ŋa x’i ma yexi tunŋanŋa , i ma saare tunŋan ŋa .
Yaxare wutu tunŋan yaxare . An yaxalenma fe , an danbilenma fe , an filenma fe .
Lenme saara tunŋan ŋa an marandifo fe , an kittidunfo fe.
Sooninken do xonci minne a joppe o da ti tunŋan ya yi
Sooninken do xenne , n mugi fana a joppe o danŋa tunŋan ya yi.
Lenmen do saara katte a joppe o danŋa tunŋan ya yi .
Futtannyaxaren do kiina kayinde , a xa joppe o danŋa ti non ya yi .
Danben bono , o nda ni daaru wagadu-xase yi , danbiloxen su xatene ya .
I xatene katta minnaŋkatta Ganjaala
O na kun toxora toxo kurunba yi , nan t’i danŋa ti : ganjaala wago
Ti xa samaqen nda an ju na fu be n’an kitten di , an na du faabandini t’a ya yi .
Samaqen d’o ju , samandinka , a ma guma n’o maxa ma kacce .
Kacce na na kacce sanpa , an ma duguta fina .
An ga na a futa dumunduyen raqen giri .
A nda garasi a ya xa fuutunden raxen giri .
A nd’a barama xa , tooen na toxi xa naxa ma kalle .
Doori kaawanten ra nta muulana a nan n’an sagonŋa , man ga na saage n’a danpu .
Nan daga noqu yi , an seren nta no , an danbilenman nta no .
Safariyen n’o maxa xo xanesolinte fallifunsubaanen di , i ga do me batten di gaaren di ,
Jopperan nt’i ya , nameran nt’i ya .
Gaaren ga na kuti teŋera baane nta kitene xanu funsunŋa .
Kinbakka , ma kinxennan dagayen ga na newo i danŋa i na teŋe no .
Banbuxu , ma saahilin nda liŋi ku beenu xa danŋa , kun xa na teŋe no .
A na toxo xanu funsun danŋa badan dagaye yi .
A na toxo xanu funsun danŋa badan sanqiye yi .
“Kittinkuunaana nan maxa kittinnimaana jalagi , t’a m’i laxadunkuuni
 
 
Abdoulaye Tandjigora
Bamako / MALI
E-mail :